Carlos Perez-Nievas Nafarroako Hezkuntza kontseilariak esan duenez, ez du D eredua gutxitzeko nahirik. Buztintxuriko eta Sarrigurengo eskoletan ez da D eredurik izango Lehen Hezkuntzan datorren ikasturtean, baina, hori horrela izan bada, matrikulazio garaian eskaintza egiteko aurreikusitako datuetan oinarritu direlako izan dela esan du Perez-Nievasek, eta ez dutela D eredua gutxietsi nahi. Maria Luisa Mangado Nafarroa Bai koalizioko bozeramaileak adierazi duenez, ordea, Eguesibarren Euskaraz Bai izeneko taldeak 18 gurasoren sinadurak bildu zituen Sarrigurenen Lehen Hezkuntzan D ereduan matrikulatzeko aukera izateko. Eguesibarren Euskaraz Bai taldeak esan duenez, berriz, gutxienez 52 dira bertan euskaraz ikasi nahi duten haurrak eta ez 8 edo 10 Hezkuntza Departamenduak esan duen bezala.